Irakurzaletasuna bultzatzea helbururik behinena duen egitasmo honek herritarrak euskarazko liburuak irakurtzera animatu nahi ditu, irakurtzearen alde atsegina azpimarratuz eta Liburutegi publikoen zerbitzuen erabilera sustatuz. Egitasmoak, parte hartzea saritzen du, liburuak erosteko abantaila ekonomikoak emanez eta liburua opari bihurtzera gonbidatzen du. Kanpaina honen beste helburuetariko bat Lizarrako Liburutegia, liburu dendak, ikastetxeak, euskaltegia, irakurle kluba, kultur elkarteak eta parte hartuko duten guztien arteko harreman eta elkarlana bultzatzea da.
Kanpainaren izenak berak argi adierazten duenez, hiru pausu eman behar dira bertan parte hartzeko:
1)Irakurri. Lehenengo pausoa irakurtzea da, euskaraz irakurtzea, alegia. Horretarako, Liburutegi publikora joan eta euskarazko edozein liburu maileguan eskatu.
2)Gozatu. Liburua irakurri, liburutegira itzuli eta fitxa erraz bat bete. Liburuzainak deskontu-txartela emango digu, euskarazko beste edozein liburu Clarin, Ino edo Irrintzi liburu dendetan erabiltzeko.
3)Oparitu. Azken pausua, liburua oparitzea da: lagun bati, senide bati, edo norbere buruari.
Horrez gain, apiril eta maiatzaren bukaeran, kanpainan parte hartu dutenen artean 30€ko bi opari-txeke zozketatuko dira. Txeke horiek ere, aipatutako liburu dendetan liburuak erosteko balio izango dute.
Apirilaren 1ean abiatu da Irakurri, Gozatu eta Oparituren 2016ko edizioa, eta maiatzaren 31n amaituko da. Hortaz, kanpainak Liburutegian bi hilabeteko iraupena izango du, baina beherapen-txartelak liburu dendetan erabiltzeko epea ekainaren 11 artekoa izango da. Aurten, egitasmoa udaberriko hilabeteetan zentratuagoa egongo da, alde batetik, liburutegietan garai hobea izaten delako, eta bestetik, liburu-opari eta trukeen dinamika, oporrak bitarteko hilabetetan garatu ahal izateko.
Irakurri, gozatu eta oparitu kanpaina Euskaltzaleen Topaguneak antolatzen du Euskal Herri osoan zehar orain dela hamar urte eta, oraingo honetan, 50 herritan ipiniko da martxan. Nafarroan, Lizarrarekin batera, herri askotan abiatu da: Altsasu, Antsoain, Arbizu, Atarrabia, Berriozar, Burlata, Irurtzun, Etxarri-Aranatz, Zizur Nagusia, e.a.
Irakurri, gozatu eta oparitu ekimenak irauten duen bitartean, bestelako literatur jarduerak ere antolatu ohi dira Lizarran. Aurten, apirilaren 13an, Mikel Martinez ipuin kontalaria izango da Liburutegian, 20:00etan, “Denboraren korapiloak” izeneko lanarekin.
IGO egitasmoa, euskara eta literatura gozatzeko eta gozarazteko aukera bikaina.
Kalen Artze (GAREAN ESKALTZALEON ELKARTEA)