Aurretik azaldu bezala, Garean Euskaldunon Elkartea 11 urte darama Pirritx, Porrotx eta Marimotots pailazoen ikuskizuna Lizarrara ekartzen. Ohi bezala, joan den urriaren 31n eskaera ofiziala egin zen Udaleko erregistroan, eta erantzun idatzia urtarrilaren 21ean jaso zuen, baimena ukatuz. Hurrengo goizean, urtarrilaren 22an, Elkarteak instantzia berri bat sartu zuen Udalari bilera eskatuz egoera argitzeko, baimen-ukatzea birplanteatzeko eta, bestela, ekitaldia egun eta ordutegi berean Remontival frontoian egin ahal izateko.
Halaber, 22ko eskaeran bertan adierazten zen jada pilotaleku honen kudeatzaileekin eta kirol talde erabiltzaileekin hitz egin zela eta ez zutela arazorik ekitaldia bertan egitearekin. Urtarrilaren 28an oraindik erantzun ofizialik ez bazen ere, beste bide batzuetatik jakinarazi zitzaion Elkarteari Udalak eskaera berria ere ukatuko zuela.
Ikusita premia, otsailaren 5a gainean zegoela, eta Gareanek ikuskizuna baldintza egokietan gauzatzeko asmo irmoa zuela, modu paraleloan emanaldia ziurtatzeko bideak jorratu ziren. Eta bide horrek fruitu emankorra eman du Oteitzako herriarekin. Gareanek eskerrik beroena eman nahi dio Oteitzako Udalari eta herriari, besteak beste horren epe estuarekin Elkartearen eskaera begi onez hartu duelako. Halaber, Elkarteak eskerrak eman nahi dizkie hainbertzeri, adierazi duten elkartasunagatik. Elkartasuna gure inguru hurbiletik haratago joan da, izan ere Gaztea irratian Maddalen Arzallusek Maite zaitut kantaren bertsio bat egin du eta Lizarraraino bidali ditu bere maitasun adierazpenak.
Oinarrizko informazioa:
“Bizi Dantza” ikuskizuna OTEITZAko Iturtxipia kiroldegian izanen da. Otsailaren 5ean, asteazkena, arratsaldeko 17:30ean
Jendea hara joan behar duenez, trafikoa eta aparkalekua antolatuko dugu. Gogoratu Tierra Estella Bus zerbitzua: joateko 16:15ean Lizarratik, 18:45 eta 19:45ean Oteitzatik.
Sarrerak salgai: gaur, urtarrilak 29, arratsaldean zehar.
Hemen mapa txiki bat:
