Lizarrako Merindadea, eskolak hizkuntza ereduen eskaintzaren arabera (D eta A ereduak). Ezkerreko mapa 2012ra arte, eskuinekoa 2015eko egokitzapen azkarra. Gainean klikatu handiago ikusteko
Lizarraldea edo Estellerria Gipuzkoa baino lurralde zabalagoa dugu (Lizarraldeak 2.070 km2, Gipuzkoak 1.910 km2), bertan 66.000 biztanle inguru bizi dira eta herri arteko distantziak kilometro askotan neur litezke. Bada, eskualde zabal horretan barreiatuta, 2015era arte, eskola publiko bakarrean eta beste hiru ikastolatan eskaintzen zen D eredua. 2015ean, urtetako borroka eta gero, euskarazko murgiltze eredua beste hiru landa eskoletara zabaldu zen: Lezaun, Abartzuza eta Ameskoa.
Zer esanik ez Tafallaldea, Zangozaldea edo Tutererrian. Herrialde horietan, antzeko zabalerako lur eremu horietan, ikastola gutxi batzuk daude barreiatuta (Zangozaldean 2, Tafallaldean 1, Tutererrian 1) eta, orain arte, ikastetxe publikorik ez. Eskari eskasaren argudioa darabilte maiz, eskaintzak izanen zuen ba zer esana ere, ezta?
Bazterketaz ari bagara, izan haur eskoletan edo ikastetxeetan, komeni da mapa hauek buruan izatea. Eta ea behingoz, hamarkaden ondoren, mapa hauek aldatzen hasten diren (hobera esan beharko, badaezpada ere).
Hemen, aldiz, bazterketaren beste mapa bat: Iruñeako haur eskolen mapa urteen joanean.
