Datorren ostegunean, urriak 18, arratsaldeko 19:30etan, Maria de Vicuña Gazteriaren etxean, arrakasta handia lortzen ari den antzezlan bat ikusteko aukera izanen dugu: “Buah txabal!”. Arrasate Euskaldundu Dezagun kultur elkartearen eskariz, Unai Iturriaga bertsolariak idatzitako bakarrizketa, Jon Zubiaga aktoreak taularatuko du.
Dibertigarria izan arren, “Buah txabal!” ez da denbora-pasa hutserako sortutako ikuskizuna. Hori baino, lan tresna bikaina da euskara, hizkuntz ohitura eta jarrerei buruz pentsarazi egin nahi duena. Publiko gazteari bereziki zuzenduta badago ere, euskaldun ororentzat interesgarria izan daiteke, adin guztietan gerta baitaitezke obran agertzen diren egoerak.
“Garikoitz Kortabitarte “Beti”, 20 urte bueltako gazte bat da. Goitizena beti lokalean sartuta egotetik datorkio. Bart, salbuespen moduan, herrira atera da parrandara eta tragedia bat gertatu zaio: mugikorra galdu du. Zergatik da, ordea, mugikorra galtzea halako tragedia? Garikoitzek horren zergatia kontatzen digun bitartean, gazte horrek euskararekin duen harreman gatazkatsua, bere izaera xelebrea eta lokaletako gazteen gaineko topikoen parodia estremo baten lekuko eginen gaitu.”
Antolatzailea: Garean euskaldunon elkartea. Laguntzailea: Lizarrako udaleko euskara batzordea. Sarrera doan!
