Datorren asteazkenean, apirilak 26, iluntzeko 20:00etan, Xabier Amuriza “Zein ongi bizi zen Ulises” kontakizunarekin izango da Lizarrako liburutegian.
“Zein ongi bizi zen Ulises” Xabier Amurizak gidatzen duen ordubete inguruko monologo literario bat da, bost zatitan banatua. Zatitik zatira pare bat minutuko tarteak izango dira, “arreta laxotzeko lain eta ez galtzeko beste”. Bertsolari eta idazle ezagunak postari-mezulari baten egun bat kontatzen du, pertsonaia eta abenturaz beterik, non herri jakituria eta jakituria kultua konbinatzen baitira, “umorea baztertu gabe, ingenioa bilatuz”.
Aurtengo Irakurri, gozatu eta oparitu kanpainaren baitan kokatzen da emanaldi hau. Aukera paregabea umorea eta literaturaren plazerrekin gozatzeko. Gareanek antolatuta, Lizarrako Udala eta Nafar Gobernuaren laguntzaz, sarrera doan.
