Datorren urriaren 23an, ostiralarekin, Euskaraz Bizi Nahi Dut lasterketa eta euszunba herrikoiak ospatuko ditugu Lizarran. Honekin IV. edizioa dugu eta iaz bezala Autobus Geltoki ondoko Koroatze plazan izanen da. 16:30etik aurrera izen-ematea eta kamiseta salmenta (iazkoa arrakastaren ondorioz kamiseta guztiak agortu eta ilarak sortu ziren, aurten ordu bete eskainiz arropa salmenta eta izen ematerako espero dugu arinagoa izatea).
17:30ean lasterketa herrikoia eta ez lehiakorra. Aurten, bi lasterketa egin beharrean, bakarra eginen dugu haurrak eta helduak batera. 18:00etan euszunba saio izanen dugu, kirol pixka bat egiteko eta ondotik argazki herrikoia, txokolate beroa (haurrentzat) eta zozketa mundiala izanen dugu.
Oharra: eguna luzatu nahi duenak, jakin dezala Larraiza dantza taldearen eskutik 20:30ean Noraezean ikuskizuna izanen dela Los Llanos Aisialdi gunean.
