Lizarrako Mendi taldearen partez: Sormendi Jarduerak

Lizarrako Mendizale Elkartea, euskara eta mendizaletasuna batzeko asmoarekin, Sormendiren jarduera proposamena antolatu du. Sormendiren baitan hilean behin ateraldi bat izanen da inguruko mendietara larunbat edo igande goizetan. Txango hauetaz gain, urtean behin asteburu osoko ateraldia egin nahi da.

Jarduera honek bi helburu ditu. Batetik seme-alabek ekintza desberdinekin gozatzea (mendirako oinezko txangoak, baita txirrindulazkoak ere, eskalada, kayaken ibili, kobazuloak ezagutu… ) eta bestetik haurrek euren artean euskaraz aritzea. Hortaz, Sormendin parte hartzeko haurrek euskaraz jakin beharko lukete, guraso edota laguntzaileek aldiz ez dute beharrezkoa euskaraz jakitea. Ateraldiak doan izanen dira orokorrean, bidaia, material alokairua zein lekuetan sartzeko sarrerak salbu. Informazio gehiago eskuratzeko, irakurtzen jarraitu:

Sormendiren antolaketa Mendizale Elkartearen kargu legoke, honen esperientziak eta zonaldearen ezagutzak jarduera erraztuko duelakoan gaude; eta ekintzen berri Mendizale Zentruaren bitartez eginen da. Oro har, Lizarrako leku jakin batetik aterako da eta bertatik kotxez joanen martxen abiapunturaino. Bestetik, ateraldiak goizean izanen diren arren, nahiko lukeenarentzako bazkaltzeko lekua topatzen saiatuko da.